الأسئلة الشائعة
أجوبة قصيرة عن IraqiStar: رسائل الفيديو، الجلسات المباشرة، حصص الأطفال، الدفع والاسترجاع.
عن IraqiStar
- شنو هو IraqiStar؟
- IraqiStar (نجم العراق) منصة عراقية تگدر منها تطلب رسالة فيديو أو رسالة صوتية خاصة من نجوم العراق، تحجز جلسة فيديو مباشرة ويا معلّمين ومدرّبين وأهل خبرة، تشترك بحصص ودورات جماعية أونلاين أو حضورية، تلگى حصص لأطفالك على IraqiStar Kids، وتطلب فيديوهات لشغلك.
- منو يدير IraqiStar؟
- تدير IraqiStar وتطوّرها شركة Code Slice LLC المسجّلة بولاية ميريلاند بالولايات المتحدة، وهي مالكة العلامة التجارية IraqiStar. وشريكنا بالعراق شركة Taskii بأربيل.
- شلون أصير نجم على IraqiStar؟
- النجوم والخبراء والمعلّمين والحضانات ما يسجّلون بنفسهم: قدّم من صفحة «انضم ويانا»، وفريقنا يراجع كل طلب قبل ما تنفتح الصفحة للناس.
رسائل الفيديو
- شلون أطلب فيديو خاص من نجم؟
- اختار النجم والمناسبة، اكتب شنو تحب ينگال، وادفع. النجم يسجّل فيديو لحد 3 دقايق إلك أو لشخص تختاره، ويوصلك برابط خاص تگدر تشوفه وتنزّله وتشاركه.
- شگد ياخذ الفيديو وقت؟
- كل نجم يبيّن بصفحته بكم يوم يسلّم. إذا النجم ما سلّم بالوقت أو اعتذر عن الطلب، يرجعلك مبلغك كامل.
- شگد سعر الفيديو من نجم؟
- كل نجم يحدد سعره. تشوف السعر الكامل، ويّا خدمة IraqiStar، بفورم الطلب قبل ما تدفع.
- أگدر أبعث الفيديو هدية؟
- إي. اطلبه لشخص ثاني وخلّيه يوصله على الواتساب أو الإيميل مالته، باليوم والساعة اللي تختارها، لحد 30 يوم قدّام.
الجلسات والحصص
- شلون تشتغل الجلسات المباشرة ويا الخبراء؟
- اختار الخبير ووقت فاضي من تقويمه، حدد 30 أو 60 أو 90 دقيقة، وادفع. الجلسة مكالمة فيديو خاصة من المتصفح أو من تطبيق IraqiStar، والغرفة تنفتح قبل البداية بـ10 دقايق.
- شنو هي الحصص والدورات الجماعية؟
- نجم أو معلّم يقدّم حصة لكم شخص، أونلاين أو حضورية، بسعر لكل مقعد. والدورة كم حصة بأيام محددة، تشتريها بمقعد واحد. إذا ما اندفع العدد الأدنى من المقاعد قبل أول حصة بـ3 ساعات، تتلغى الحصة وكل واحد يرجعله مبلغه كامل.
IraqiStar Kids
- IraqiStar Kids آمن للأطفال؟
- كل معلّم وحضانة على IraqiStar Kids يتأكد منهم فريقنا أول. الحساب دائماً باسم واحد من الأهل، والطفل ما عنده حساب. الحصص الجماعية للأطفال بدون دردشة، والجلسة الفردية ويا طفل تتسجّل حتى يشوفها الأهل، وتنمسح بعد 30 يوم.
IraqiStar Business
- أگدر أطلب فيديوهات لشغلي من النجوم؟
- إي، عن طريق IraqiStar Business. اكتب طلبك ويا يوم التصوير، والنجم يبعثلك سعره، وبعض النجوم عندهم سعر ثابت. وتگدر تستخدم الفيديو بتسويق شغلك وإعلاناتك، حتى الممولة، بدون مدة محددة.
الدفع والاسترجاع
- شلون أدفع؟
- حسب اللي متوفر ببلدك: تدفع أونلاين بالبطاقة أو المحفظة الإلكترونية، أو بالتحويل لحساب كي كارد مالتنا. وبرّه العراق تنسحب البطاقة بالدولار. الأسعار بالدينار العراقي.
- إذا صار شي غلط؟
- عندك 24 ساعة بعد ما يوصلك الفيديو أو تخلص الجلسة حتى تبلّغ عن مشكلة، وفريقنا يراجع كل بلاغ. وإذا النجم اعتذر عن طلبك، أو ما سلّم بالوقت، أو تلغّت الحصة، يرجعلك كل اللي دفعته.
عطاء
- شنو هو عطاء؟
- عطاء هو العطاء مال IraqiStar: كل طلب مدفوع يدعم حملة خيرية، الحملة اللي اختارها النجم أو حملتنا الرئيسية. وصفحة كل حملة تبيّن شگد جمعت.
ما لگيت جوابك؟ راسلنا ونرد عليك.
تواصل ويانا